சைவமும் தமிழும் தழைத்தோங்கும் யாழ்ப்பாணத்தின் வடபகுதியில் அமைந்துள்ள சப்த தீவுகளில் ஒன்றாக மிக எழில் மிகு தோற்றத்துடன் அமைந்துள்ளது புங்குடுதீவு என்னும் அழகிய கிராமம். அங்கே பல அறிஞர்கள், பல ஆயிரம் ஆசிரியப் பெருந்தகைகள், கவிஞர்கள், கலைஞர்கள், வணிகப் பெருந்தகைகள், சமூக சேவகர்கள் என்று வரலாறு போற்றும் மக்களைப் பெற்றெடுத்த பூமி என்ற பெருமையுடன் விளங்கும் கிராமத்திலே, சைவர்கள் நிறைந்து வாழ்ந்த பெருங்காட்டு மண்ணில் கிராஞ்சியம்பதி சிவனும், கிரஞ்சியம்பதி முருகனும் அருகருகே கோவில்கள் என்று இரு ஆலயங்களை அருகே கொண்ட அழகான புங்குடுதீவின் மத்தியிலே 1926 ஆண்டு சைவகலாமன்றத்தினால் இந்தப் பாடசாலை பலநூறு கல்வித் தாகம் கொண்ட மாணவர்களுக்கு கல்விப்பணி செய்ய ஆரம்பிக்கப்பட்டது. ஆரம்பத்தில் இதன் வளர்ச்சிக்கு யாழ்ப்பாணம் சைவவித்தியா விருத்திச் சங்கம் பேருதவி புரிந்து வந்தது.

இந்தப் பாடசாலையை அந்த காலத்தில் யாழ் இந்துக் கல்லூரியின் முன்னாள் அதிபராக விளங்கிய திரு. டைரூப் அவர்கள் திறந்து வைத்தார்கள்.

ஆரம்ப காலங்களில் இப்பாடசாலையில் இருபாலரும் இணைந்து கல்விகற்ற கல்விக்கூடமாக விளங்கியது. அத்துடன் பல வருடங்கள் அந்த ஊரில் பிறந்து வாழ்ந்து தங்கள் உயர்கல்விகளை வெளி மாவட்டங்களில் முடித்தாலும் பல அதிபர்கள், ஆசிரியப் பெருந்தகைகள் தங்கள் கல்விப் பணியை சிறப்பாக தங்கள் ஊரின் வளர்ச்சிக்காகவும், அதன் குழந்தைகளின் கல்வி மேம்பாட்டிற்காகவும் தங்களை அர்ப்பணித்து தங்கள் சொந்த மண்ணிலேயே இந்தப் பாடசாலையில் பணிசெய்தமையை யாராலும் மறந்திட முடியாது.

அப்போதெல்லாம் அந்தக் கல்விமான்களின் விடாமுயற்சியாலும், அர்ப்பணிப்புகளால் இந்தப் பாடசாலை எல்லாவற்றிலும் முன்னிலைப் பாடசாலையாக திகழ்ந்தது என்றால் அதில் எவ்வித ஐயமில்லை.

ஆரம்பத்தில் இருபாலரும் கல்விகற்ற பாடசாலை, பின்னர் புங்குடுதீவில் பல பாடசாலைகளில் இருபாலரும் கல்விகற்று வந்த நிலையில் புங்குடுதீவுக்கு ஒரு மகளிர் பாடசாலை வேண்டும் என்ற பலபேரின் கனவுகளையும், ஆசையையும் நிறைவேற்ற காலம் கனிந்துவர ஆரம்ப காலத்தில் புங்குடுதீவு ஶ்ரீ சுப்பிரமணிய கனிஷ்ட மகாவித்தியாலயமாக இருந்த எங்கள் பாடசாலை 1980 ஆண்டு இலங்கை அரசாங்கத்தினால் யாழ்/புங்குடுதீவு ஶ்ரீ சுப்பிரமணிய மகளிர் வித்தியாலயம் என்று பெயர் மாற்றம் பெற்று ஒரு தனிப் பெரும் மகளிர் பாடசாலையாகவும், புங்குடுதீவின் ஒரே ஒரு பெண்கள் பாடசாலையாகவும் இன்றுவரை தழைத்தோங்கி நிற்கின்றது.

அந்த பாடசாலையில் கல்வி கற்று பல துறைகளில் முன்னிலையில் இன்று இலங்கை உட்பட பல்வேறு நாடுகளிலும் பெரும் உயர் பதவிகளை வகிக்கின்றார்கள் இந்தப் பாடசாலையின் முத்துக்கள்.